Carlos Núñez regresa aos escenarios cunha homenaxe aos anos nos que foi “o sétimo Chieftain”.

Entre os anos 94 e 97, The Chieftains, con Carlos Núñez como membro honorífico do grupo, gravaron o disco Santiago, que foi galardoado cun premio Grammy.

Este galardón foi un fito sen precedentes que consagrou a conexión musical entre a nosa tradición e o mundo.

Durante eses anos extraordinarios, Carlos incorporouse ao universo da lendaria banda irlandesa, compartindo con eles estudos de gravación, escenarios e as xiras internacionais máis importantes do grupo, xunto a grandes artistas universais de todos os xéneros.

Esta relación foi moito máis alá dunha colaboración musical. Carlos chegou a converterse en parte da familia de The Chieftains e o seu fundador, Paddy Moloney, bautizouno cariñosamente como “the seventh Chieftain” —“o sétimo Chieftain”—.

Tres décadas despois, Carlos recupera o espírito desa época nos escenarios dunha nova xira mundial, compartindo co seu público a emoción dunhas experiencias que transformaron para sempre a súa música e a súa maneira de entender a vida.