O ensemble Música Práctica inaugura o ciclo Ópticas contemporáneas 2024 da Cidade da Cultura o domingo 15 de setembro cun percorrido pola creación musical máis recente que culmina nunha obra en estrea de Fernando Buide, especificamente escrita para o multiinstrumentista Abraham Cupeiro, invitado de honra do concerto.

Miradas na memoria é o título que engloba un programa no que escoitaremos composicións de Leonardo Balada (Cataluña), Joseba Torre (País Vasco) e Fernando Buide (Galicia), tres compositores contemporáneos aos que uniu Pittsburgh, a cidade do aceiro. Intercalados entre elas neste concerto sen pausas, soarán fragmentos do Horóscopo do alemán Karlheinz Stockhausen.

Pechará o programa La constelación de Sagitario de Fernando Buide, encargo conxunto da Quincena Musical Donostiarra e a Fundación Cidade da Cultura a través dos seus programas de  apoio á creación artística. Nesta obra, o músico galego Abraham Cupeiro tocará varios dos instrumentos ancestrais que vén recuperando: o carnyx celta, o aulos grego e o cornu romano, así como bucinas mariñas, presentes en tantas culturas sonoras. Unha constelación que permite resoar en nós un mundo perdido e agora recobrado.

Ensemble Música Práctica:

• - Regina Laza, violín

• - Fernando Buide, piano

• - Manuel Lorenzo, violonchelo

• - Alejandro Sanz, percusión

- Abraham Cupeiro, solista multiinstrumentista

PROGRAMA

(interpretado sen pausas)

• - Karlheinz Stockhausen (1928-2007). TIERKREIS. Aquarius

• - Joseba Torre (1968). MÚSICA DE CÁMARA II

• - Karlheinz Stockhausen. TIERKREIS. Géminis

• - Leonardo Balada (1933). CUATRIS

• - Karlheinz Stockhausen. TIERKREIS. Libra

• - Fernando Buide (1980). LA CONSTELACIÓN DE SAGITARIO. Con Abraham Cupeiro, solista. OBRA EN ESTREA